فرحان بس حزيـــــــــــــــن

الحقيقه أنا مش عارف أبدأ إزاي ,,, حصل معايا موقف غريب جداااا

  حبيت أشاركم القصه دي ,, موقف فرحني جدا بس كمان أحزني جدااااااااا ,,,!؟؟

من يومين كان عندي مشوار في مكان قريب من بيتي في مصر الجديده .. وبعد ما خلصت كنت واقف أمام أحد الأنديه الرياضيه الكبرى الشهيره في مصر الجديده وفي مصر كلها ,,!!؟

وفجأه سمعت صوت من بعيد ,,,,, حضرتك عاوز تاكسي يا فندم ؟؟؟

وكانت المفاجأه ….!!!؟؟؟؟؟

لقيت الصوت ده , لشاب صغير في السن لا يزيد عن عشرين سنه ويمكن أقل , وشيك جدا راقي جدا وكانت المفاجأه لما قرب مني ,, قالي .. أنا فلان ,, إسمه من الطبيعي إنه مسلم !؟؟؟

المهم قالي : انا فلان من شباب النادي  وطبعا وراني كارنيه النادي … إحنا مجموعة شباب من النادي بنحاول مشروع ونساعد بعض إننا نشتغل بعد الظهر او بعد الكليه

بعربيتنا الشخصيه زي التاكسي ,, وبنعمل تخفيض عن أي تاكسي عشرين في الميه

بصراحه الموقف كان غريب عليا شويه وفعلا الولد واقف جنب عربيته وعربيه شيك زيه ,,,,, المهم انا فرحت بيه وقلت له ماشي انا موافق وأحب أساعدكم يلا بينا ,,!؟

حقيقي كنت فرحان به جدا وحسيت إن الشباب الصغير في بلدنا بدأ يتغير …!؟؟

إتكلمنا في حاجات كتير , سألته عن رأي أصحابه في النادي الولاد والبنات إلي من سنه .. طبعا رأيهم متباين .. مابين موافق ومعترض .. وكلام كتير ,, الكلام بينا تطرق إلى موضوع الثوره من أوله لأخره ,, بسأله إيه رأيك في إلي بيحصل دلوقتي والإعتصام في التحرير … كان الرد على طول .. أنا أموت عشان التحرير ,,,!؟؟

سألته يعني إيه .. انت موافق ؟؟؟ قالي طبعا حضرتك دي الحريه , الكرامه , الثوره , الديمقراطيه ,,,,!؟

قولت له .. طب مش الديمقراطيه إن إحنا نسمع بعض ونحترم رأي بعض , قال لي أيوة مظبوط , قولت له طب فين احترام الرأي والناس إلي في التحرير عاوزه تمشي رأيها على باقي الناس ,,,, سكت شويه وإبتسم ,  سألته إيه رأيك في إلي حصل في شارع محمد محمود والأولاد الصغيره الي كانت بتطلع كده من النص وترمي على قوات الأمن طوب وتشعلل الموقف , قالي أصل ده كبت من زمان ثم هم دول إلي جابولكم الحريه والكرامه

طبعا الرد كان غريب شويتين عليا ,,,!؟!؟!؟

قولت إزاي يابني ,, إلي جاب الحريه وعملوا الثوره إلي كانوا في التحرير في يناير ,, ولهم كل التقدير والإحترام

إحنا مش ضد الثوره ولا التغير ,, لكن ضد الفوضه بإسم الحريه ,,!؟

المهم ,, قولت له أنا بشتغل في السياحه … وحجم الخراب والخسائر الي إحنا فيه

بص لي بإستغراب كأنه أول مره يسمع الكلام ده .. قولت له انت عارف الخسائر عندنا كام مليار ,,,, تعرف ان إحنا حوالي 2000 شركه ,, من يناير مفيش شغل وفي قطاعات تانيه كتير كده ,,,, قال لي معلش انشاءالله شويه وتعدي ,, لازم يحصل كده

سألته : طب لغاية ما تعدي مين هيأكلنا ويدفع مرتبات الموظفين ؟؟؟؟

سكت مردش , بيسمع بس ؟؟

قولت له  حاجات كتير ,, الحقيقه إنه كان بيسمع ومحترم في كلامه

وبعد ما خلصت كلامي وقبل مانزل من العربيه , قولت له هي دي الديمقراطيه والحريه

لازم نسمع بعض لازم نحترم بعض , ممكن نتعلم من بعض مش عيب ؟!؟

انا أكبر منك بحوالي 19 أو 20 سنه لكن مش عيب إني أسمعك وأتعلم منك , وانت كمان ممكن تتعلم مني ..أنا عندي أصدقاء كتير وزملأ من سني ومن سنك وأكبر مني ومنك , مش عيب إن إحنا نتعلم من بعض ونسمع كلام بعض ,, سيدنا النبي كان بيعمل كده وبيسمع كلام الأخرين وبيسمع الأطفال وكان بيلعب معاهم كمان وكل الأنبياء عملوا كده , هو أنا هاكون أحسن أو أشرف من سيدنا النبي ,,,,؟!؟!؟

ورد عليا رد … مفاجأه زي الصاعقه على دماغي خلاني نسيت كل الكلام التاني إلي قولناه ,,, رد وقال ,, أه إيه يعني ,, ممكن تكون أشرف أو أحسن من النبي , إيه المشكله …ده بني أدم زي زيه , أدى رساله وخلص إلي عليه ومات  .. ليه بقى أعبده وأفضل كل شويه أكرم وأقدر فيه وأبالغ في المكانه بتعاته  ,,,, بصراحه أنا كنت في حالة زهول وصدمه بالغه … لكن سبحان الله أنزل عليا هدوء غريب

قولت له يا ابني إحنا مش بنعبد غير ربنا لكن بنحترم النبي ونقدره

سألته .. يعني إنت أحسن من سيدنا النبي أو سيدنا المسيح أو سيدنا موسى أو أي نبي أخر ,,إزاي ياإبني ,, دي ناس أنبياء ربنا إصطفاهم وطهرهم وجعل مكانتهم فوقينا وأعلى مننا كلنا  , ده كلام ربنا مش  كلامي أنا ,,,, !؟

 قال لي ,, ده كلام بقى عاوز شرح طويل ؟!؟!!؟!؟

قولت له على كده انت مؤمن بربنا , قال أه طبعا دي حاجه تانيه , لكن حكايه النبي دي إنه أحسن مني  يعني ,,,, ؟؟؟

المهم حاسبته وسيبت العربيه ونزلت وأنا في قمة الحزن والأسي ومش عارف أعمل ايه ,, معقول للدرجه دي أولادنا والشباب الجديد وصل لي كده ؟؟؟؟

طيب دي مسئولية مين ؟؟؟

وإزاي شاب في السن ده ,, بيتكلم كده ومش عارف أبسط واساسيات قواعد دينه ؟

وبيتكلم كده عن الأنبياء والرسل  ,,,؟؟؟

عزرا سيدي رسول الله وسيد خلق الله  , عزرا سيدي الكريم المسيح كلمة الله وروحه , عزرا سيدي موسى كليم الله , عزرا كل أنبياء الله , عليكم صلاة الله وسلامه أجمعين 

إيه رأيكم ياجماعه في الموقف الغريب ده ,, معقول هم دول شباب مصر ؟؟؟

هم دول أجيال المستقبل ؟؟؟؟

لا حول ولا قوة إلا بالله , إنا لله و إنا إليه راجعون